Såg du noko til kjerringa mi?

Ragna Marie Mauset tok i mot publikum og ønska velkomen til denne vårkonserten på kulturhuset søndag 14. april. Sunndal Musikkforening satt klar på scena og starta med musikk frå Chicago og West Side Story. Korpset fekk "låne" dirigent Torgeir Bitnes, som òg har dirigert dei eit par år tidlegare. Korpset avslutta med nydeleg musikk av Eric Clapton. 

Så var det Surnadal Skulekorps sin tur til å gå på scena, saman med dirigent Torgeir Andresen, som har vore dirigent for dei i tre og eit halvt år. "Den kortare utgåva av Torgeir Bitnes" som Andresen sjølv omtala seg som. Til tross for at dei er eit skulekorps som består av 11 elevar, imponerte dei med flott musikk.

– Vi har ikkje vanleg korpsbesetning. Vi manglar eigentleg ein del instrument, men vi ser meir på det som eit band enn eit korps, seier dirigent Torgeir Andresen.

Korpset opna med "Festive Intrada" av Bjørn Magne Nyhagen og "Hedwig's Theme" frå Harry Potter. Andresen seier at dei eigentleg er for få i korpset til å spele begge låtane, men han tykkjer at dei er så flinke og at det høyrest bra ut uansett.

Vidare spelte korpset blant anna den norske folkevisa med det flotta namnet "Såg du noko til kjerringa mi?" og musikk frå Kardemommeby.

På dei nesten fire åra Torgeir har vore med skulekorpset fortel han at dei har vore på mange fine turar og spelt fine konsertar og hatt det mykje moro.

–Eg blir like imponert kvar gong eg høyrer dykk og tykkjer de blir berre betre og betre, sa Ragna Marie Mauset til skulekorpset.

Surnadal Hornmusikk kom deretter til scena for å bli med på skulekorpset sin siste song. Før dei byrja å spele kom Kristin Holten, leiar i Surnadal Skulekorps, til scena for å utdele ei gåve og ein takk til dirigent Torgeir Andresen. Dette var nemleg hans siste konsert med skulekorpset.

–Vi er mange som er utruleg imponert over kva de har fått til i løpet av desse tre og eit halvt åra, ut av ein så liten gjeng med musikarar, sa Holten.

Andresen fekk sjokolade og ei slipsnål med ein trompet på i gåve for sin innsats i korpset, noko som passa bra til ein som ikkje berre er ein fremragande dirigent, men òg ein utruleg dyktig trompetist, som Holten sa.

–Tusen takk for laget, Torgeir, og lykke til vidare, avslutta Kristin Holten.

Surnadal Hornmusikk og dirigent Torgeir Bitnes fortsette showet med blant anna "Vårsøg", som ga publikum både vårstemning og frysningar.

–Fin musikk! Eg byrja å høyre på Henning Sommerro lang tid før eg kom til Surnadal, fortalde dirigent Bitnes.

Heilt til slutt blei det ei storslagen avslutning med eit storkorps på 44 stk. frå Surnadal Hornmusikk og Sunndal Musikkforening. Bitnes har dirigert begge korpsa og kjenner repertoaret godt.

Det første vi fekk høyre frå dei to korpsa var ukrainske Cherubic hymn arrangert for korps av komponist John Philip Hannevik. Bitnes forklarte at Hannevik forsøkte å få sjokket og fortvilelsen av krigen inn i musikken. Første gong den vart framført var under Oslo Brassfestival i april 2022.

Sunndal Musikkforening og Surnadal Hornmusikk avslutta med Nora Brockstedts "Voi voi" og Robert Lamms "25 or 6 to 4" før Mauset takka publikum for oppmøtet. Korpsa skal spele same konsert i Sunndal om to veker. Vi takkar for ein flott vårkonsert!