Full fart på kinoen

Surnadal kino viser to filmar kvar dag frå søndag til onsdag før påske. Alle er rimeleg energiske – men rett over påske kjem det ein du kan roe deg ned med!

Filmane som går måndag til onsdag blir vist på dagtid, så merk deg tidspunkta. Tidlegfilmen onsdag er forresten premie for SUPER MARIO BROS. Dei to ikoniske rørleggar-brørne, kjent frå Nintendo-spela, skal da på eventyr gjennom Soppriket.

Barnefilmen dagane før er AGENT MAX som handlar om den eigenrådige byharen Max som går på Påskeakademiet – og håpar å bli sjølvaste meisterharen. «En søt film om hvordan samhold og vennskap seirer over det onde», skriv Kinomagasinet, gir den fem på terningen og skriv at den nok passar best for dei minste barna.

Det er ikkje berre Super Mario som tek turen over frå spelverda og til kinolerretet: DUNGEONS & DRAGONS: HONOR AMONG THIEVES, basert på det snart femti år gamle spelet, blir vist søndag og måndag. «Jøss. Så gøy!», skreiv VG i forkant av premiera denne helga: «Det beste Hollywood-eventyret på aldri så lenge:»

Og treng du verkeleg eit action-kick før påske, er det ingen som slår JOHN WICK når han no gjer ferdig det fjerde kapittelet i soga. Filmen er lang, men umerkeleg lang – og opplagt noko ein må få med seg for dei som likar hardtslåande filmar. JOHN WICK CHAPTER 4 går tysdag og onsdag (kl. 16) før påske.

Og treng du å trekke pusten, får du sjansen på dagtid tysdag og torsdag etter påske: DE ÅTTE FJELLENE (bilde øverst i saken) bør treffe fjellvante og introverte nordmenn som er fascinert av eit stillare liv i stor natur. DE ÅTTE FJELLENE handlar om vennskapet mellom to menn over fleire tiår, og «dette, kombinert med naturbilder så vakre at de kan ta pusten fra deg, gjør «De åtte fjellene» til en dyp, emosjonell og smellvakker utforsking av meningen med livet, veivalgene vi tar og hva vi kan bety for hverandre» (NRK).