Surnadal, kom dykk på teater!

Teatret vårt var i helga igjen på besøk i Surnadal med ei ny forestilling, denne gongen med namnet "Norsk Sangbok". Publikum skjønte nok på førehand at det kom til å bli song og musikk, men fekk seg truleg eit par overraskingar under kveldens forestilling.

Kvelden starta med korsong av elevane ved Nordmøre Folkehøgskule, dei framførte songane "Solskinnsdag", "Forelska i Lærern" og "Tenke Sjæl" med eige band. Elevane skal ha skryt for fin song og at dei viser seg og bidreg med kultur til bygda. Etter dei hadde varma opp for folket i foajeen, blei dei sjølv med inn til Storstuå.

Da dørene til Storstuå opna slo dufta av sveler ut av rommet. Medan folk fann plassane sine sto Bjørnar Lisether Teigen med ei stor takke og steikte sveler midt på scena. Han informerte om at det ville bli både ein smakebit og loddtrekning litt seinare.

På scena vart publikum kjend med fire personar som hadde starta eit kor. Dei hadde øvd på songar frå songboka. Ein av medlemmane i koret hadde derimot litt andre planer enn dei tre andre. Midt i synginga av kjære norske songar frå boka måtte koret handtere små og store forstyrringar frå Bjørnar som både velta svele-utstyret, kledde seg ut med trollkostyme, reiv ned sceneteppa og meir til.

Både Sara Fellman, Kjersti Sandal, Ole Andreas Silseth og Bjørnar Lisether Teigen imponerte stort med sine store songstemmer og god innleving. Nokre av songane vi fekk høyre var "Se ilden lyse", "Å eg veit meg eit land" og "Voi voi". Det var ein god variasjon av nydeleg song og mykje latter og absurditet! Dette var ei forestilling som publikum kjem til å hugse.

Vi er heldige som får besøk av så talentfulle skodespelarar og songarar, og at Surnadal har eit godt kulturtilbod. Vi set spørsmålsteikn ved høg billettpris i høve til lengda på forestillinga. Vi oppfordrar likevel folk i Surnadal og omegn til å nytte seg av tilboda og dra på teater, konsert, revy og det som skjer! Takk til Teatret Vårt for nok ei flott forestilling, vi håpar dykk kjem tilbake snart igjen.