Statnett informerte om ny kraftline frå Surnadal til Sunndal

Den nye kraftlina vil ha både større kapasitet og overføringshastigheit enn dagens kraftline har, og den vil betre forsyningssikkerheita og kapasiteten i nettet nord-sør.

Den nye kraftlina vil i all hovudsak følgje traseen til den dagens lina. Når den nye lina står ferdig i løpet av 2027, vil den gamle bli demontert og fjerna i si heilheit. Traseen til den nye lina er 40 meter brei, og inkluderer kryssing av Todalsfjorden.

Bredesen Graving & Transport er snart ferdige med å forsterke vegar og bruer, samt å bygge riggplassar. På den nordlege delen av prosjektet, frå Surna transformatorstasjon til Todalsfjorden, er det to bruer, ei i Kvenndalen og ei på Hjellnes. Også på den sørlege delen, frå Todalsfjorden til Viklandet transformatorstasjon er det to bruer.

I løpet av sommaren vil canadiske Victor Energy, som har fått kontrakten på å bygge den nye kraftlina, starte arbeidet med å støype fundamenta til lina. Kraftlina går gjennom fleire områder med forskjellege miljømessige reguleringar, noko prosjektet må ta omsyn til i sitt arbeid, sjølv om dette inneber utfordringar både tidsmessig og reint teknisk. På den nordlege delen av prosjektet er det fire slike områder.

Det vil bli mykje bruk av helikopter under bygginga av den nye kraftlina. Helikopter blir bruka både under støyping av fundament, montering av mastene og til slutt å montere kraftlina til mastene.

Informasjonsmøte om den nye kraftlina i Surnadal og Sunndal

Onsdag kveld var det informasjonsmøte for den nordlege delen av prosjektet i Svorkasalen på Surnadal kulturhus. Torsdag kveld er det informasjonsmøte for den sørlege delen av prosjektet på Ålvundeid.

Ganske mange, dei fleste av dei grunneigarar, kom til Svorkasalen for å få høyre Statnett informere om prosjektet. Det kom litt kritikk om at informasjonen i samband med prosjektet var litt mangelfull, noko Statnett lova å ta tak i og få retta opp.

Dei aller fleste grunneigarane er positive

Det er 180 grunneigarar langs den 47 kilometer lange traseen. Statnett har allereie på plass avtale med 120 av desse, og dei reknar med å kome fram til ein avtale med dei aller fleste av dei siste 60 før sommaren.

Erstatninga som kvar grunneigar får for å avstå grunn til den 40 meter breie trassen reknar Statnett med å ha på plass i løpet av hausten. Prosjektleiar Ole Johan Hjemås kunne fortelje at grunneigarane i området her stort sett var positive til å avstå grunn til kraftliner, og rekna difor med at dei unngjekk ekspropriering av grunn.

Avslutta med to kortfilmar

Informasjonsmøtet vart avslutta med to korte informasjonsfilmar om korleis ein bygger kraftliner i dag. Ein kan trygt seie at dette er presisjonsarbeid på øvste hylle, og da spesielt av helikopterpilotane!