Ytring i ei skjebnetid

Eg veit ikkje kor uinteressant det er kva ein pensjonert skulemann meiner om skulenedlegging. Men med erfaringsbasert kunnskap frå skule og oppvekst i mange tiår, frå eit godt lokalmijø gjennom heile livet, med bygdefolkets vedvarande dugnad for å skape og bevare rotfesta trivsel og meining, tør eg ikkje sitte stille og sjå på at nokre få stemmer kan rasere det generasjonar har bygd opp gjennom hundrevis av år.

Takk til alle engasjerte og samvittighetsfulle foreldre, samstemte FAU og grendalag, til skulefolk og andre som syng ut sin advarsel i desse skjebnetider. Det rektor Lisa Forslund uttalar på fb og i pressa, er gull verdt – essensen av vår felles protest. Stor takk, Lisa! Frå innsida kjenner eg kva dette handlar om. Skulle ønske at de som no skal seie Nei eller Ja til eit forhasta og skjebnesvangert «spareforslag», også hadde nødvendig basiskunnskap om ALLE sider ved livet i lokalsamfunna. Det er ikkje berre-berre å nulle ut bygdene sine oppvekstmiljø!

Det vil for all framtid vera ein stor urett å la små elevar, foreldra og bygdene betale rekninga for at Surnadal har blakka seg på heilt andre område! Og viss vi nokon gong skal tru at partia ikkje lyg i programma sine, må dei lytte til folket dei skal tene og stå for lovnadene sine. La ingen vera i tvil: I dag kjempar alle vi i gamle Åsskard for fellesskulen Bøfjord-Bæverfjord – slik dei gjer i dei andre bygdene som er trua. Samtidig minnest vi prosessen da Bøfjord-skulen vart nedlagt for nokre år sia. Nokre politikarar, pressgrupper og lokalmedia har lita ære av korleis det skjedde.

Vi håpar inderleg å bli respekterte på ein betre måte når vi no advarer mot uoppretteleg nedlegging av Mo, Todalen-Stangvik og Bøfjord-Bæverfjord!

Også no spør ein seg om korleis media følgjer med. Kva med kritiske spørsmål til det som i mange år har ført Surnadal til Robek-grensa?

Vi forstår at økonomikrisa legg press på kommunestyret. Men dette er ein kortvarig lidelse samanlikna med ei historisk uboteleg utarming av dei oppvekstmijøa og bygdene som no er utblinka til skyteskiver! Noko ingen ser dei fulle konsekvensane av.

Vi kan ikkje godta at 5-6-åringar skal miste 2 timar leik og aktivitet til daglege bussreiser!

Vi kan ikkje forstå korleis den alt overfylte skulen på Øye skal ta imot 120 elevar til. Vi kan ikkje stryke ut (vitenskapeleg dokumentert) betydning av tilhørighet og identitetsskaping i eit trygt miljø der vi kjenner både naturen og kvarandre.

Vi kan ikkje fjerne bulysten for unge familiar ved at skulen er så langt unna at dei må flytte etter. Kva betyr da «Heim til Surnadal»?

Vi kan ikkje glømme faren for rotløyse og tap av identitet. Nok å minne om aukande psykiske problem blant unge (sjølv om det har mange årsaker).

Vi kan ikkje oversjå tapet av eiga historie og kulturverdiar når unge i ein viktig livsfase blir rivne opp frå næmiljøet sitt.

Historia sin dom vil bli hard viss dei vi har gjeve tillit til bestemme, no gjer uopprettelege vedtak utan å sjå heilskapen dei også er valde til å ta vare på!

Det er frå politikarar med god grunn ytra bekymring for innlegg med ufinheter - som ofte florerer på sosiale media.

Men sakleg og konstruktiv protest må fram når umistelege verdiar står i fare!

Bernt G. Bøe