Mange å minnas, mangt å sjå

Minnelunden

Minnelunden med ein stor bautastein med namnskilt på er plassert ved kyrkjemuren framfor den sørlege inngangen til kyrkja. Urneplassane er på begge sidene av grusgangen mot sør.

Planarbeidet for minnelunden starta i førre soknerådsperiode med ein komité der Arnhild Foseide Fagerholt, Ingeborg Landsem, Ola Ytredal, Inge Solheim og Brit Grete Moen var medlemmer.

Lars Stokke kom med i arbeidet da han vikarierte som kyrkjetenar. Saman med Inge Solheim vart det laga teikning av anlegget og utforminga av det. Sidan har Stokke stått for mesteparten av arbeidet med minnelunden.

Rune Røen frå Rindal Maskin leverte stein, både til fundament og til bauta. Han hjelpte også til med boring og samankopling av steinane, som var henta frå Kvammen Steinbrudd.

A. Kvam har levert fine blomsterkassar og store lamper på søyler i corten-stål etter idé frå Lars Stokke. Corten-stål får ei ytre hinne av rust som gjer at rustprosessen går 6-8 gonger seinare enn vanleg stål.

Stemninga rundt minnelunden tydde på at alle var svært godt nøgde med både plassering og utforming. Det blir mange gode minnestunder på benkane der.

Les meir om den namna minnelunden her!

Fotoutstillinga

Rundt om langs steingjerdet ved kyrkja er det plassert 10 bilde på aluminiumsplater. Det er Eli Landsem Solvik som står bak den utstillinga. Ho har Rindal kyrkje som eit av dei mest brukte fotomotiva sine. Av helsemessige grunnar hadde ho måtta redusert turane sine i fjell og utmark, fortalte ho. Da vart kyrkjegarden og Igltjønna dei mest brukte turmåla og fotomotiva hennar.

Ho starta med 32 bilde, og enda opp med 10 bilde som ho fekk kopiert over på aluminiumsplater slik at dei kan stå ute heile sommaren.

Det bildet ho set mest pris på er det ho tok av tårnet den 13. april 2015 der sola skin gjennom stillaset rundt det nyrestaurerte kyrkjetårnet etter lynnedslaget og brannen eit knapt år tidlegare.

Eit anna bilde som vekker sterke minner viser far hennar i solnedgang over Skåkleiva, sett frå Langlimarka.

To av bilda er oversiktsbilde, eit teke frå Langlimarka, og eit frå Høglia ovafor Landsem. Nedtråkka gras viste at mange hadde studert desse bilda!

Ta deg ein tur og sjå på bilda i ro og mak! Dei blir ståande heile sommaren.

Du kan lese meir om bilda her!