Annonse
Stangvikfestivalen:
Mor og son stiller ut keramikk på Galleri Bondehuset
Kunstnarane beskriv at det har vore ein møysom prosess som har teke både tid og tankegang.
Live Sunniva Smidt opna utstillinga med eit nydeleg stykke av Bach på cello, som sette stemninga for å nyte kunsten frå Guri Sandvik og Ebbe Arnesen.
Live er ein av festivalartistane som ein får sjå fleire gongar i løpet av helga.
Brit Dyrnes ønskte velkomen til eit fullt Galleri Bondehuset, og introduserte dei to festivalkunstnarane Guri Sandvik og Ebbe Arneberg.
Keramisk kunst
Guri og Ebbe arbeider hovudsakleg med keramisk kunst, med leire av ulike slag. Det eine kunstverket er faktisk laga av lokal leire som vart funne i Stangvika i fjor.
Guri Sandvik og Ebbe Arneberg bur i Oslo, men Guri kjem frå Kristiansund.
Dei har vore i Stangvik sidan måndag, og prøvd å løyse korleis dei ulike kunstverka skal stå i akkurat dette rommet. Dei har sjølv bygd utstillingssokler og designa utstillinga akkurat slik dei ønskja å ha det.
– Det er alltid spanande, når ein kjem til eit gallerirom og skal løyse rommet. Korleis tek dette form? sa Brit Dyrnes.
Mellomromma får fram emosjonar
Guri fortalde at ho høyrde Live spele tidlegare same dag, og at ho tenkte på pausene i musikken, og korleis det skapa ei spenning og fekk fram emosjonar. På same måte er mellomromma mellom kunstverka, og måten dei står på, viktig for korleis ein oppfattar kunsten.
Gode rammer for arbeid med kunsten
Ebbe er Guri sin son, men dette er første gong dei har ei utstilling saman.
Ebbe viste stor takksemd for korleis dei har blitt teke imot under festivalveka.
– Eg har ikkje vore på folkehøgskule, men eg føler dette er litt det same, sa han.
Han beskreiv det å bli innlosjert i eit fantastisk hus saman med dei andre kunstnarane, og få jobbe lange dagar, berre avbrutt av deilige måltider 3-4 gongar om dagen. Dette tykkjer Arneberg er fine rammer for å arbeide med utstillinga.
Guri og Ebbe sin kunst er òg å sjå på årets Stangvikfestival-skjorte, som ein kan få kjøpt på festivalen.
Brit Dyrnes delte ut blomar som var "sjølrappa frå ein hage oppi lia", og gratulerte dei to kunstnarane så mykje med utstillinga!
