Annonse
Midtsommar i Surnadal
Innhaldsrik «Kunstnatt»
Som ein av programpostane under «Midtsommar i Surnadal» inviterte Surnadal kunstforening, saman med fleire aktørar, til «Kunstnatt» fredag kveld.
Samarbeid i fokus i Svorkasalen
Det heile starta med at kulturleiar Lilly Husby ønskte velkomen til Svorkasalen på Surnadal kulturhus og "Kunstnatt", før ho gav ordet til todalingane Siri Skjerve og Toril Redalen.
Siri og Toril fortalte om samarbeidsprosjektet dei starta da dei studerte saman på Kunsthøgskolen i Oslo, og som dei kallar «Line Made by Walking». Dette er eit samarbeid som ikkje er knytt til eit spesifikt prosjekt, men eit samarbeid dei brukar for å lufte idear og få gjennomført kunstprosjekt.
Siri er mest kjent for sine kunstverk laga i dyrehud og skinn frå lokale jaktlag i Todalen, medan Toril er keramikar og vart i 2023 tildelt statens kunstnarstipend for ti år.
Sjølv om Siri og Toril ofte samarbeider, er dei også sjølvstendige kunstnarar som deltek på utstillingar med eigne kunstprosjekt kvar for seg.
Situasjonen og kunstprosjektet avgjer om vi samarbeider eller gjer det kvar for oss, fortalte dei to til slutt i Svorkasalen.
To blad Dyrnes i Kallastuå
Frå Svorkasalen gjekk turen til Kallastuå. Her hadde Brit Dyrnes og dotra Mira Dyrnes Askelund sett saman ei utstilling med teikningar montasjar i leire vi fekk sjå. Dei fortalte også litt om kunstverka sine og kvar dei har henta inspirasjon til dei frå.
Brit er hovudsakleg keramikar, men arbeider også innafor andre disiplinar. Ho har mellom anna langt over tretti offentlege utsmykkingar på CV-en. Ho er og eigar og drivar av Kvenna Kunstverksted. Ho hadde stilt ut nokre av sine montasjar i Kallastuå.
Dotra Mira er utdanna skodespelar ved Royal Conservatoire og Scotland, der ho studerte i åra 2011 – 2014. Ho er i dag skodespelar ved Trøndelag teater. Men Mira er også ein ivrig teiknar, og vi fekk sjå fleire av teikningane hennar i Kallastuå fredag kveld.
Utstillinga i Kallastuå er opa søndag 23. og 30. juni klokka 13.00-17.00 og torsdag 27. juni klokka 15.00-19.00.
Gruppeutstilling på Surnadal Billag
På Surnadal Billag på Surnadalsøra var det gruppeutstilling med Māris Čačka, Beate Gjersvold og Jon Arne Mogstad.
Māris Čačka er frå Latvia og er der direktør for det verdskjente Rothko-museet i Daugavpils. Māris er kjent for å lage abstrakte uttrykk ved å kombinere bruk av måleri og grafikk. Han var reprsentert med eit stort veggmåleri, som han hadde måla rett på veggen inne på Surnadal Billag.
Beate Gjersvold er bildekunstnar og kunsthistorikar. Ho arbeider innenfor fotografi, silketrykk, installasjonar og akvarellar, men der er akvarellar som dominerer kunsten hennar. Beate hadde kalla utstillinga si «Tid» og den bestod av utvalde akvarellar.
Jon Arne Mogstad er professor i bildekunst og sentral i Surnadal Billag kunstsenter på Surnadalsøra. Jon Arne hadde ei eiga utstilling i tredjeetasjen på Surnadal Billag som vi fekk sjå samstundes som han fortalte litt om kunstnarkarriera si.
Finale på Frivilligsentralen
Siste etappe for «Kunstnatta» gjekk frå Surnadal Billag til Surnadal Frivilligsentral på Skei. Her arrangerer Surnadal kunstforening «Pop-up»-utstilling. Dei seks lokale kunstnarane Sissel Halset Storslett, Anne Marie Rognskog, Siv Halle, Rannveig Brøske, Anne Grete Kvendset og Lilly Husby stilte ut nokre av måleria og teikningane sine.
Kunstforeninga si utstilling på Surnadal Frivilligsentral er også opa laurdag 22. juni frå klokka 11.00 og utover ettermiddagen.
Surnadal open si «Kunstnatt» var ei innhaldsrikt arrangement, og mange møtte opp for å vere med på den kunstneriske rundturen i Surnadal fredag kveld.
