Annonse
Utegudsteneste i Åsskard søndag
Grendaplassen på Åsskard er gudstenestearena søndag. Barnedåp, preike, fiolinmusikk, kyrkjebåtroing og vakker utsikt bidrar til ein fin kyrkjedag.
Grendaplassen ligg ved bustadfeltet nedafor vegen ytst i Åsskard-grenda, nokre hundre meter vest for kyrkja. Avkjøring blir skilta. Det er ordna med parkering for bilar. Ein kan gjerne ta med eigen stol.
Prosten leier gudstenesta
Prost Vidar Wilhelmsen Rygh forrettar. I teamet deltek elles klokkar Randi Bøe, organist Bernt Bøe og fiolinist Synnøve Hammervold, truleg også ei songgruppe. Dagens takkoffer går til kyrkjelydsarbeidet.
Roing med «Hjelmkonnå»
Til gudstenesta kjem også roarar med kyrkjebåten «Hjelmkonnå». Desse startar i 10-tida frå Småbåthamna i Bøfjorden.
Arrangør for båtturen, Bøfjorden Historielag ved høvedsmann Tore Sannes, tilbyr frivillige til å bemanne årane i den klassiske kyrkjebåten. Turen «på gammelmåten» innover Åsskardfjorden er ei minneverdig oppleving. Roarane kan ta med eigne redningsvestar - eventuelt også sitteunderlag og hanskar.
Museet inviterer etterpå
Etter gudstenesta inviterer Bøfjorden Sjøbruksmuseum til kaffesamver. Der kan ein også få med seg kåseriet «Heimspråket vårt».
Ved dårleg ver blir gudstenesta flytta til Åsskard-kyrkja.
ANNONSE:
