Konfirmantane imponerer!

Gi utfordring! Vis tillit! Og resultatet blir lysande! 

Onsdagens lysmesse med unge krefter i Åsskard-kyrkja var bokstaveleg tala ei strålande stadfesting av påstanden.

Stil og høgtid

21 konfirmantar frå Surnadal utførte liturgien suverent. Her var talande symbolbruk av levande lys, stilfull prosesjon, lesing av gode tekster og bøner, liturgisk dans og korsong. Ein tankevekkjande andakt var forma som samtale mellom to jenter.

Konfirmantane viste seg tilliten verdig. Kvar av dei tok godt vare på sine oppgåver. Og ikkje minst synte dei den ro og høgtid som hører heime i kyrkjehuset.

Vaksne hjelparar 

Etter solid arbeid på førehand kunne prost Vidar Rygh og kateket Odd Erik Stendahl lene seg tilbake og overlate kvelden til disiplane sine.

Kyrkjeverje Tor Rune Halset sørga for klokkeklang og TV-formidling. Organistane Amund Valde og Bernt Bøe la til musikk etter behov.

Randi Bøe, Sverre Hatle, Kay Arne Svensli, Jane Svensli, Kari Aarnes og Aashild Settemsdal utførte andre stabsoppgåver. To femteklassingar, Harald Aasbø og Einar Vetleseter Melling, fekk kvar sin Teikneseriebibel i gåve frå kyrkja si.

Peikar mot jul 

Konfirmantane sin innsats denne kvelden var bokstaveleg tala lysande! Den løfta vakkert fram lovnadene som peikar mot jul. Preikedialogen med Solvor og Ada fokuserte på ei høgtid med Jesus i sentrum.

Adventsserien med lysmesser i Surnadal starta i Todalen søndag og blir avslutta i Mo kyrkje torsdag kveld.