Fjellgruppa på tur til Åkvikknoken

Denne tysdagen starta Fjellgruppa turen i den vene Halsabygda. Vi gjekk langs vegen ovanfor gardane, som låg der velstelte etter kvarandre. Deretter oppover skogsveg og etter kvart fint opparbeid sti. Der er det lagt ned mange arbeidstimar! Men det er ein måte å ta vare på naturen på: på myrlendt lende med mykje trafikk blir det snart berre gjørma utan fast grunn. Og no såg vi at vi var mange - vi var eit langt tog der vi gjekk etter kvarandre, heile 34 og ein hund som tok ut i godveret. 

Og opp på Åkvikknoken kom vi! Ein utruleg fin plass, med utsyn vide omkring. Tustnastabbane låg der så breie, men ikkje verre enn at havet blenkte utover. Dei langsynte sa dei såg Gripfyren uti der; vi får tru dei på ordet.

Det var skikkeleg varmt der vi rasta i solsteiken. Spesielt hunden tykte det var i heitaste laget vinterpelsen sin, og lite vatn å finne. Men ei av damene tok vassflaska si og slo opp i drikkekoppen og spanderte på den tyrste firbeinte. "De gode gjerninger skal redde verden", sa B.B. Så sant så sant. Det er godt med ein slik tur i godt ver og godt lag.