Annonse
Innhaldsrik nyttårsfest
Den tradisjonelle nyttårsfesten på Eidet bedehus samla folk frå fire kommunar og hadde eit stort og variert program, både verbalt og musikalsk, leia av Svein Volle.
Ola Bræin gav oss ei fin orientering om samlinga av dyrebar folkemusikk i vårt distrikt, ikkje minst gjennom eit stort historisk arbeid av hans far, Edvard Bræin. Og på munnspelet bar han fram, vart og inderleg, mange av desse perlene, spesielt frå Stangvik/Todalen, men og andre, som Visetone frå Romsdal. Av dei lokale var vel den mest kjente Juleverset frå Stangvik, men og «Midt i hårdest vinter..» og dei kontrastfylte tonane til den såre «Når mitt øye, trett av møye..» og den glade «Når jeg blant englers kor en gang..»
Både nyttårsverset og juleverset vart også vakkert sunge av Karen Oddny Gravvold på den lokale variant av toner frå Åsbøgarden.
Sverre Hatle las fleire innhaldsrike dikt om tida vår og livet, også eit eige skrive dikt.
Fellessong høyrer med på ein fest, og den eminente pianisten Bjørn Vevang både akkompagnerte og improviserte og satte spiss på festen. Flott og mektig solosong av Svein Volle kom også til sin rett med slik musikk. Songar av Einar Ekberg og Gunnstein Draugedalen og den fine songen om bønn av Herman Wildenwey og Johan H. Grimstad.
Hovedtalar på festen var tidlegare sokneprest Bjørn Hovde som «deklamerte» store bolkar av Bibelen utanboks, både frå Det gamle og Det nye testamentet ut frå temaet om skuld og soning. Abels blod (vår skuld) som ropar til ein Gud som ser menneska og som viser nåde gjennom Jesu reinsingsblod «som talar sterkare enn Abels blod.» Som ikkje ropar, men talar til Gud.
Fin bevertning og hyggestund ved borda høyrer også med på ein bedehusfest. Og sjølv om det nettopp hadde vore jul, så gav forsamlinga over seks tusen i gåve til arrangørane, Normisjon og Eidet bedehus.
Etter å ha avslutta med salmen «Jeg tror på jordens forvandling», hjelpte mange med å rydda og hausta juletreet som hadde stått frå tidlegare juletrefest til tjuand - dag jul neste dag.
