Bondehuset er til stor samfunnsnytte – får 400 000 kroner frå Kulturminnefondet

Sjølv om huset har vore jamnt vedlikehalde, treng det no eit skikkeleg løft for å framleis kunne vera den praktfulle storstua for store og små høve. Kulturminnefondet har gleda av å tildele inntil 400 000 kroner til reparasjon av fasadar. 
Dette skriver Kulturminnefondet i ei pressemelding.

Opera, Vårsøg og festspel 

I ei tid der utflytting, nedlegging av butikkar og skular truar mange bygder i Noreg, er store kulturtiltak viktige. 

Stangvik er ei lita bygd i ein forholdsvis liten kommune, men klarer likevel år etter år å befeste seg som ei viktig festival i Midt-Noreg. Stangvikfestivalen har fått ord på seg for å ha ekstrem høg musikalitet og særeigenskap. 

I tillegg har dei fleire andre kulturarrangement der grendelaget samarbeider med Operaen i Kristiansund, Vårsøghelga og Festspela i Kristiansund. 

– Utvikling av Bondehuset er eit prosjekt som ivaretar både miljømessig, sosial og økonomisk berekraft, skriv Lise Mari i søknaden til Kulturminnefondet. 

Vil utvikle for framtida 

Sjølv med jamnleg vedlikehald, ber forsamlingshuset preg av å trenge eit skikkeleg løft, særleg med tanke på bruk i framtida. Skadeomfanget består av utette vindauge som ikkje er originale med vatnlekkasjar og følgjeskader der det er råteskader i kledning og konstruksjon. 

Bondehuset rommar mellom anna ein stor sal med scene, ei mindre sal, ei stue, eit stort kjøkken, i tillegg til kaffikrok, galleri og pub der bygdefolk, turistar og hyttefolk møtes. 

– Vi har alt det eit grendehus treng, men håpar å utvikle tilbodet og at huset skal vera i like god stand om 100 år, skriv Lise Mari vidare i søknaden. 

Dei gamle teikningane er teke vare på, og Stangvik Grendelag vil bruke desse som grunnlag for oppgraderinga. 

– Bygningen er stor og krev mykje energi. Tiltaka bidrar til stor samfunnsnytte for lokalsamfunnet, og energieffektivisering er avgjerande for vidare bruk, seier styreleiar i Kulturminnefondet, Hanne Kristin Jakhelln. 

400 000 kroner frå Kulturminnefondet skal gå til:

Tilskot blir gitt for å reparere fasadene mot aust og sør ved å reparere og skifte råteskada kledning, tilleggsisolere med treullisolering eller celluloseisolering og tilbakeføre vindauge lik dei originale.