Annonse
«Klagemuren» dukkar fram
Du treng ikkje dra til Jerusalem: «Klagemuren» finn du også på Bølandet! No stig han fram att etter mange år under torva.
Til Bøfjordhelga i juli er den gamle treffplassen avdekt og og blir restaurert som arena for underhaldning og historiske tilbakeblikk.
Samlingsstad
Denne muren på Naustbakken attmed Coop-butikken på Bølandet, var samlingsstad i gamle dagar. Mest for mannfolka i bygda - kvar søndag og på kveldar når dei venta på «Dampen».
Samtalane gjekk om laust og fast, også om slikt som folk her i utkantbygda var misfornøgde med. Da vart «Klagemuren» det naturlege namnet. Etter kvart vart han mindre bruka og grodde meir og meir ned.
Ryddedugnad
Under planlegginga av årets Bøfjordhelg, med Coop’en og Naustbakken som sentrum, kom ideen om å restaurere muren.
Og da den utrøttelege patrioten Inge Dønheim inviterte til ryddedugnad laurdag, var ikkje folk tunge å be. Dusinet fullt stilte med grev og spade, og etter ein halvtime var den lange muren oppe i dagen.
Trekkfullt «lokale»
Da Tidens Krav-journalisten Odin Kvendset besøkte det isolerte Bølandet (utan vegsamband) i 1938, skildra han nettopp ei slik mannssamling – eit «ting» – på Naustbakken.
– Lokalet er riktignok litt trekkfullt, skriv han.
- Men det lot ikke til at deltakerne følte sig besværet av det. Det var langt fra kjedelig å stå der og høre på, for kjevene gikk uavbrutt - foruten skråtobakken var det nemlig adskillig som skulle tygges igjennem før møtet blev hevet!
Naustbakk-visa
Miljøet vart seinare gjenstand for ei vise, der det mellom anna heiter:
På bakkå oppfor nausta ligg ein gammel gråsteinsmur
snart nedgrodd punni grasa der han halla.
Her møttest gammelkaran når dem rukla seg ein tur
te tings – på Klagemura, så dem kalla.
Kvar søndags føremeddag da va tingjet jamnan sett
- og ørkankvelda, føre rutebåta.
Og da vart saker drøfta, stort og smått og rangt og rett,
og flokan dem vart løyst på mange måta.
Der kom det folk frå aust og vest – tå Bakkå og tu Or’n,
frå Stakknesa og gardå innpå Høgden.
Ja, somtid kom ’n Ludvig Geilå roand over fjorden
og villa prek om laust og fast tu bøgden.
Og no blir det altså nytt liv på og attmed den legendariske «Klagemuren»!
