Sesongslutt på sjøbruksmuseet

At fattigmannsretten sildball er furkunnmat, viste det gode frammøtet på finaledagen. Trekninga i sommarens utlodning drog også interesserte. Like eins Alex Kurbanovs klaverperler til taffelet. Ein historisk fotokavalkade over 450 temadagar sia sjøbruksmuseet starta i 1995, passa også bra.

God mat og musikk

Sildballen, koka av Kjell Arve Vikavoll etter lokal oppskrift og servert med poteter, bacon og kålrabi, fall bokstaveleg tala i smak. Det var middagsgjestane samstemte om.

Middagen vart akkompagnert med evergreens på klaver, lekkert spela av Aure-organist Alex Kurbanov, som denne gong representerte balldagens faste ensemble, «Hjemmelaget».

Raust loddkjøp

Dagen avslutta også sommarens utlodning. Den er eit fundament i finansieringa av museet, som ikkje har fast offentleg stønad, men er heilt dugnadsbasert. Og sjøl om publikumsbesøket har vore litt under snittet i år, sette utlodninga ny rekord – med over 35.000 kroner.

Trekninga fordelte ei stor gevinstsamling til nye eigarar både i salen og med adresse lenger unna. 

– Vi skuldar rause gjevarar og trufaste loddkjøparar stor takk! sa sekretær i Bøfjorden Historielag, Gunnhild Vetleseter Bøe.

Glimt frå 30 aktive år

Som Dagens Tema synte historielaget ein biletserie med glimt frå denne sommaren og frå museets 30-årige historie. Attåt sommaropne søndagar er dette også arena for besøk av skuleklassar, grupper og foreingar. 

- Det er i tråd med formålsparagrafen – «å ta vare på og gjera levande lokal kultur og historie», seier styret. - Dertil rundar museumsbygget, det tidlegare ungdomshuset Bygdevangen, 90 år i år. Så her sit historia i veggane!

Frå før Svartedauen

På lerret gjekk lokalhistoria med raske skritt og med sjøsprøyt for baugen: Frakteskutene med sand til gjenoppbygginga av Kristiansund by etter krigen. Dramatisk lokal krigshistorie. Margit og Magda med kardene og rokken. Lærar Aalmo som starta skyttarlag, fråhaldslag, misjonsforeiningar og postkontor.

Ja, endatil middelalder i Bøfjorden før Svartedauen: Den rike «husfrøya» Gyrid i Åkvika gav store eigedomar til korsbrørne i Nidaros – deriblant «Drifasætre i Bøarfirði», som det står i eit skiinnbrev frå 1303 – første gongen vi ser dette bygdenamnet i skrift.

Kanskje kjem historielaget seinare med meir dokumentasjon frå dei første 30 åra på sjøbruksmuseet.

Stadig nye gåver

- Historielaget får stadig nye gåver til samlingane på museet, fortel styret. - I år har Frode Bjerkestrand gjeve oss ein klinkabåt bygd på Bølandet i 1932, Bjørn Kvalnesvik ein fin FM båtmotor (Fredrikstad Motorfabrik) og ikkje minst har vi fått flott nordmørsvevnad etter sjølve dronninga i dette faget, Johanna Halse.

Sabben laga stemning

Museets faste maskinist, Anders Vaagland, sørga også på balldagen for at for at Sabb-motoren ved inngangen tøffa og laga stemning for dei frammøtte.