Denne har vore etterspurt, seier Mayse på Coop Marknad Bøfjorden og gler seg til å selje årets «Gamle Nordmør»

Foto: Bernt Bøe

«Gamle Nordmør» er her

Bernt G. Bøe innsendt bidrag

Publisert 27.11.2022 - 10:04

- No er «Gamle Nordmør» på plass! seier Mayse på bua på Bølandet. Folk har spurt, og laurdag kom årboka, rykande fersk.

Det er Bøfjorden Historielag som gir ut «Gamle Nordmør», i år for 11. gong på rad. Tittelen viser at heile Nordmøre er stoffområde og dermed nedslagsfelt. Sjøl om mykje tilfang sjølsagt er frå lagets nærområde, er ikkje boka avgrensa som «årsskrift for Bøfjorden».

Leiar Bernt Bøe i Bøfjorden Historielag har redigert boka og skrive mykje av stoffet.

Innhaldet spenner frå kunst og kyrkjestoff, via naturoppleving og skipshistorie, til lokale bedrifter og småindustri frå nær fortid. Visste du om Åsskard Sementfabrikk ? Enn om produksjon av ski, tresko og klehengarar i Bøverdalen?

Gamle Nordmør markerer at klinkabåt-tradisjonen no er verdensarv hos Unesco. Båten «Talgsjøen», bygd på Bølandet i 1922, er ein verdig representant.

Eitt personportrett viser du Hans (Nyhuså) Bævre, skiløpar med bilfirma og småindustri. 300-årsjubilanten Ole Joensen Kolset var Nordmøres fremste kyrkjekunstnar gjennom tidene.

Stykket «Fjurulangs» er ei kulturguide for båtturistar og røpar opplevingar du neppe visste om. Ragnar Mauset skriv om fiske langs Surna i barndommen. Lars Indreiten inviterer til fjelltur med Håkkåsteinen som mål.

Årboka guidar turen «Fjurulangs» - med mykje ukjent historie for båtturistar.

«Trollgaupa i Kvalnesvika» dukkar opp i artikkelen «Fjurulangs». Randi Bøe finn segna i årboka og deler den med barnebarna Einar (t.v.) og Syver.

«Kongehelsinga på Hjelmen» ein sjeldan godbit. 95-årige Brit Sæterbø fortel her til «Gamle Nordmør» at det var ho og tre andre ungdommar som under krigen skreiv «Håkon 7» med stein på toppen av fjellet – som klar beskjed til okkupasjonsmakta!