![Historietime i full konsentrasjon](https://image.trollheimsporten.no/294748.webp?imageId=294748&width=960&height=548&format=jpg)
Niande inntok museet
Bøfjord-dag er fast innslag når niande klasse i Surnadal avsluttar skuleåret. Da hører historietime på sjøbruksmuseet med. Slik også sist onsdag.
Dertil fekk Bøfjorden Sag besøk av dei to klassegruppene. Her var mykje å oppleva om ei bedrift som har funne sin særeigne plass i trelastindustrien og sysselset mange.
Avslutninga av dagen skjedde med mat og leik ved Røsslyngen 4H sin gapahuk i Mjøksanden.
Historikk på museet
Men før det var Bøfjorden Historielag vertskap på sjøbruksmuseet. Der sat fortida og forteljingane laust. Elevane viste imponerande interesse, og mange fekk prøve utstyr frå samlinga.
![Leon «gjekk til filmen» - i drakt som var bruka i kinosuksessen «Same Jakki» frå 1957 Gutt i kofte](https://image.trollheimsporten.no/294754.webp?imageId=294754&x=0.00&y=0.00&cropw=100.00&croph=87.07&width=960&height=1000&format=jpg)
![Søvestringen passa perfekt til Tora – her toler ho både regn og sjøskvett!](https://image.trollheimsporten.no/294756.webp?imageId=294756&x=0.00&y=0.00&cropw=100.00&croph=100.00&width=960&height=826&format=jpg)
Alle testa kunnskapane sine i ein quiz, eller «haubrott», som eksamen. To av bordlaga klarte faktisk 24 rette av 24 delvis vanskelege spørsmål!
![To lag scora fullt hus – 24 rette – på «eksamen» til slutt. Her er eine vinnarbordet – der kvar fekk museets penn i premie](https://image.trollheimsporten.no/294758.webp?imageId=294758&x=0.00&y=0.00&cropw=100.00&croph=100.00&width=960&height=740&format=jpg)
Historielaget har som uttrykt mål «å gjera levande og vidareformidle lokal historie og tradisjon». Kva er da betre målgruppe enn unge i konfirmasjonsalderen?
Hindenburg - og tysk bombe
Kanskje vil dei hugse litt og – om skipsbygging og om «Bøfjord»-mannskapet som vart heidra av rikspresident Hindenburg etter å ha berga tyske fiskarar under storm i Østersjøen. Om sandfraktinga til oppbygginga av Kristiansund etter krigen. Og om bomba som trefte dampbåten – utan å eksplodere: Styrevengen av denne bomba eig museet.
![Jan Einar i oljehyre, Nicole med «skjømla» for å skremme silda inn i nota. I andre handa held ho vengen av bomba som eit tysk fly sleppte over rutebåten i 1940](https://image.trollheimsporten.no/294752.webp?imageId=294752&width=960&height=548&format=jpg)
Sag, meieri og Mannbjønn
Oppgangssaga Zetumb Saug dreiv stort i «hollendertida» på 1600-talet. Og meieriet i Ådalen leverte smør til Newcastle for 120 år sia. Frå 1940 var det bureising i Settemsdalssletta.
Men aller mest inntrykk gjorde kanskje den forferdelege historia om Mannbjønnen som drap fem menneske i 1770-åra - før meisterskyttaren Tølløv fekk livet av han. Om det no var med sølvkule eller ikkje ...