Idrettshistorie på museet

Leikarvollen stadion i Bøfjorden fyller 50 år. Historikk om banen og idrettslaget blir søndagens biletkåseri på sjøbruksmuseet.

Bøfjord IL vart stifta i 1946 og hadde først ein liten grusbane. Glimt frå første tida, m.a. med det legendariske Makkolaget, er med i programmet.

I nesten 20 år var så Bøfjord utan eigen bane. «Heimekampane» gjekk på Halsa og i Surnadalen (mest Bjørn-banen). Laget gjorde det likevel godt - med kretsmesterskapet i 1967 som eit høgdepunkt.

Etter stor dugnadsinsats kunne ny grasbane på Leikarvollen takast i bruk i 1973. Sia kom klubbhus med garderobe - før dette vart kombinert med nytt grendahus på 1990-talet.

Tema på museet søndag blir altså fargerike glimt frå fotball og annan idrett i Bøfjorden - både før og etter bygginga av Leikarvollen. Arrangøren håpar både veteranar og unge talent stikk innom.

Programmet kjem i høveleg tid etter avslutninga av søndagens Blåfjelløp mellom Bøfjorden og Halsa og er ei fin oppfølging av dette.

Torbjørg og Inger Lise byr i alle fall på kaffe og småbrød, is og brus.