Fjurulangs rundt Bøfjorden

Søndagens biletforedrag på Bøfjorden Sjøbruksmuseum tek for seg kulturminne, hendingar og terrengnamn langs stranda frå Skrøvsetvika til Bøkleppnausta.

Sett frå båt, som i gamle dagar, finst det mykje interessant på denne strekninga. Mangt er kanskje gått i glømmeboka?

Biletserien fortel mykje om handelsstaden og trafikknutepunktet Skrøvsetvika. Sildnotbruka i Settemsbukta etterlet seg mange minne – også tragiske. Meieriet i Ådalen leverte smør til Newcastle i England.

Settemsørane har 400 års sagbrukshistorie. Kryssing av Bøsundet, med båt i hundrevis av år og med bru sia 1964, set Bølandet i fokus – mest med fiske, båtsbygging og sjøfart.

Her kan ein nyte flott fjordnatur via lerretet. Og om ikkje anna, bør tips om fiskeplassar interessere både fastbuande og turistar!

Terrengnamna florerer. Historielaget spør om du veit av Kobben, Rompå, Byttollneset og Slufshammaren? Svar på dette og meir til sit laust!

Og med Ragnhild og Gunnvor på kjøkenet er serveringa i dei beste hender.