Gratiskino, Gentleman og Gullspång

Seniorfilmklubben viser Robert Redfords farvel med kinolerretet onsdag 21. februar kl. 12, og tittelen er svært passande: DEN SISTE GENTLEMAN (2018). Filmen er basert på den sanne historia om Forrest Tucker, ein 70 år gamal bankranar som slit med å slutte med det han er god på. Men han er så høfleg når han gjer sine bankran, at politiet blir mest forvirra i jakta på han. Robert Redford har med seg Sissy Spacek, Tom Waits og andre kjente i eit verdig punktum for ei lang filmkarriere.

Merk deg også MIRAKLET I GULLSPÅNG, som går på kino på dag- og kveldstid tysdag og torsdag. Det er ein norsk/svensk dokumentar med ei forteljing som går langt utover det fattbare. Eit teikn frå Gud gjer at dei to norske søstrene May og Kari kjøper ei leilegheit i den lille svenske byen Gullspång. Dei får sjokk når dei ser at seljaren er prikk lik deira søster, som døde for tretti år sia. Seljaren er også fødd på same dag som søsteren og dei innser at dei må vere i slekt. Så utviklar det seg i enno rarare retningar. Skal ein tru kritikarane er MIRAKLET I GULLSPÅNG filmen du MÅ få med deg i 2024.

To nye kinopremierer i helga: VICTORIA MÅ DØ (9-års-grense) er faktisk ein komisk familiefilm. Noko som ikkje er lett å lese ut av tittelen. Mora til Hedvig og Henrik er død, og faren har fått seg ein ny kjærast, Victoria, som tek styringa i heimen. Så sterk styring at Hedvig og Henrik meiner det får vere nok og tykkjer det er best at ho forsvinn for godt. NRK melder at «det er noe deilig «Roald Dahlsk»» over filmen og trillar ein 5-ar på terningen. VICTORIA MÅ DØ har premiere fredag kl. 18 og blir også vist som gratisforestilling onsdag 21. februar kl. 10 som eit tilbod i vinterferien. Ingen billettar blir gjeve bort på førehand, så «først-til-mølla»-prinsippet gjeld.

Den andre nye filmen er MADAME WEB (12 år) som har premiere fredag kl. 20. Da er vi tilbake i Marvel-universet og opphavet til ei av dei mest gåtefulle heltinnene der. Dakota Johnson spelar «madammen» som oppdagar at ho har sterke klarsynte evner, noko som gjer at ho må hjelpe andre i fare. MADAME WEB vil også bli vist som gratisforestilling, for dei over 12 år, onsdag kl. 14 – også etter «først-til-mølla»-prinsippet.