Mariadag med årsfest

Åsskard feirar Maria Bodskapsdag med dåpsgudsteneste, årsfest og tilbakeblikk på eit fint kyrkjeår 2024.

Åsskard sokneråd ved Bernt G. Bøe innsendt bidrag

Publisert 20.03.2025 - 13:47 Sist oppdatert 22.03.2025 - 12:16

Maria-dagen med framtidshåp og lovnader er eit lyspunkt i fastetida. Det vil prege tekster og songar i messa - denne gong leia av Torbjørn Brøske.

Takk for stor gåve

- Og så viser vi kva vi har kjøpt for gåvemidlane etter Sigrunn Bævre si gravferd i fjor, seier soknerådsleiar Eva Jorid Svendsen.

- Nytt antependium, eller forheng, til altaret er nettopp montert. Og to flotte lysestakar til evangelieprosesjon vil prege gudstenestene i framtida.

Gåve: Det nye altarforhenget er på plass – ei gåve etter Sigrunn Bævre. Den nystelte duken oppå er frå 1993 – laga av Alfhild Aasgård og fleire.

Også dei nye evangeliestakane er gåve frå familien Bævre

Soknerådet uttrykkjer stor takk til familien Bævre og til Jorunn Heggset, som har sydd antependiet. Ein takk går også til Svanhild Bævre, som har stelt og vaska den kvite, vakre duken frå 1993 som ligg over altaret.

Kyrkjeliv – «eit under»

Annonse

Sidan kyrkjelydens årsfest er lagt til bodskapsdagen, vil tekster og songar markere både dåpen, Marias liv, Jesus-håpet og aktivt kyrkjeliv i vår tid. Gudstenesta munnar difor ut i den visjonære salmen «Guds menighet er jordens største under». På salmelista står 799, 591, 638, 691, 131 og 536.

Middag og tilbekeblikk

Kaffen denne søndagen er utvida til middag for alle - med påfølgjande glimt av kyrkjelivet i Åsskard i 2024. Attåt kort årsmelding og rekneskap vil ein biletserie gi gjensyn med av barnearbeid, konfirmantaktivitet, gudstenester, hobbytreff, musikkliv og mykje anna.